Mar Mar Ke Jiye Yun Duniya Mein Jine Ka Saliqa Bhul Gae

Bano Tahira Sayeed

mar mar ke jiye yuun duniya men jiine ka saliqa bhuul ga.e

benam-o-nishan kuchh aise hue ham naam bhi apna bhuul ga.e

sahra se hui nisbat jab se viranon men mahfil jamti hai

ai josh junun tere sadqe abadi se rishta bhuul ga.e

sab hausle dil ke past hue sahil pe safina kya pahuncha

maujon se ulajhna chhoḌ diya tufanon se laḌna bhuul ga.e

ik ḳhvab sa jaise dekha tha ta.abir na thi koi jis ki

avaz hai kuchh kuchh yaad magar naqsh-e-ruḳh-e-zeba bhuul ga.e

ab kis ka sahara baaqi hai ab kis se shifa mange koi

bimari ne apna kaam kiya tum jab se masiha bhuul ga.e

itna hai hamara afsana ai ‘tahira’ itna yaad rahe

murjha.e hue ghunche ki tarah khilne ki tamanna bhuul ga.e