Kaun Ab Jae Tere Pas Shikayat Le Kar

kaun ab jaa.e tire paas shikāyat le kar

roz aate haiñ tire ḳhvāb mohabbat le kar

is qadar mujh se takalluf kī zarūrat kyā hai

maiñ agar tujh ko chūñgā to ijāzat le kar

husn be-parda huā aur tavaqqo ye hai

ishq dekhe use āñkhoñ meñ sharāfat le kar

daftar-e-ishq kā sarkārī mulāzim huuñ maiñ

lauT jā.ūñgā tirī diid kī rishvat le kar

apnā chehra thā kabhī jin kī tamannā ‘yāsir’

ab vo kahte haiñ nikal jaao ye sūrat le kar

Leave a Comment