ḳhamosh dab-e-ishq ko bulbul liye hue
gul mast hai chaman men piyala piye hue
imsal fasl-e-gul men vo phir chaak ho ga.e
agle baras ke the jo gareban siye hue
ham bhi hava men ik gul-e-nau-ḳhez-e-husn ke
barson phire hain chaak gareban kiye hue
dokanen mai-faroshon ki kab se paḌi hain band
rah rah ga.e hain qufl diye ke diye hue
ishq-e-sanam hai is men hain ḳhuddariyan zarur
ai dil ḳhuda ke vaste ḳhud ko liye hue
murshid hai ishq ham hain murid us janab ke
barson guzar ga.e hain piyala piye hue
vo aa ke muskura.e is andaz-o-naz se
khul khul ga.e jo zaḳhm-e-jigar the siye hue
roz-e-azal se daḳhl vajud o adam men hai
donon ilaqe hain ye hamare liye hue
hain but-parast dair men haaji hain ka.aba men
talib raza-e-dost ke dharne diye hue
maidan-e-imtihan men hamen bhej dijiye
kahiye unhen ye kaam hain jin ke kiye hue
namard apne vaadi men rakkhega kya qadam
sar ho muhimm-e-ishq na be-sar diye hue
kis kis tarah ka bhes badal kar pahunchte hain
ashiq hue na aap ke bahrupiye hue
hasil hua buton se na ashiq ko mudda.a
raushan kabhi na dair men ghē ke diye hue
ta.aviz o naqsh kuchh nahin karte asar vahan
saare ye khaTkhaTe hain hamare kiye hue
ik shab hui nasib-e-sulaiman na jo pari
ham roz so.e us ko baghal men liye hue
ankhon men phirti hain jo vo ankhen nashilyan
do botalon ki masti hai be-mai piye hue
bandha jo chust chust mazamin-e-nau ke saath
bandish se meri tang bahut qafiye hue
ashiq mizaj rote hain paḌh paḌh ke beshtar
ash.ar ‘rind’ ke na hue marsiye hue
Leave a Reply