Iqbal Sajid
aise ghar men rah raha huun dekh le be-shak koi
jis ke darvaze ki qismat men nahin dastak koi
yuun to hone ko sabhi kuchh hai mire dil men magar
is dukan par aaj tak aaya nahin gahak koi
vo ḳhuda ki khoj men ḳhud aḳhiri had tak gaya
ḳhud ko paane ki magar koshish na ki anthak koi
baagh men kal raat phulon ki haveli luT ga.i
chashm-e-shabnam se chura kar le gaya ThanDak koi
de gaya ankhon ko farsh-e-rah banne ka sila
de gaya bina.i ko saughat men dimak koi
ek bhi ḳhvahish ke hathon men na mehndi lag saki
mere jazbon men na dulha ban saka ab tak koi
vo bhi ‘sajid’ tha mire jazbon ki chori men sharik
us ki janib kyuun nahin uTThi nigah-e-shak koi
Leave a Reply