le ja.un kahin un ko badan paar hi rakkhun
main apni ḳhalaon ko pur-asrar hi rakkhun
ankhon se girun aur uThun dasht-e-falak tak
paani huun to sat.hen miri hamvar hi rakkhun
duniya ko bhi le aa.uun kabhi nok-e-zaban tak
gha.eb hai jo us ko sar-e-iz.har hi rakkhun
lamhon ki daraḌon men uga.un koi jazba
hai vaqt khanDar to use mismar hi rakkhun
ijad karun saat samavat ka chehra
chehre pe tire lams ko bedar hi rakkhun
anfas ke nuqte men simaT aa.uun ‘riyaz’ ab
yuun apne bikharne ke kuchh asar hi rakkhun
Leave a Reply