mas.ala huun main sada se kam-nigahi ke liye
kaun uTThega bhala meri gavahi ke liye
lauT aaya phir se vo tufan sahra ki taraf
shahr men baaqi na tha kuchh bhi tabahi ke liye
aaj bhi main teri ankhon ke jaziron men panah
DhunDhta phirta huun apni be-panahi ke liye
dil ke dariya men miri yadon ki gahra.i talak
Duub ke aa.ega kaun ab ḳhair-ḳhvahi ke liye
bolte rahne se ai ‘shahzad’ kuchh hasil nahin
ḳhamushi darkar hai is kaj-kulahi ke liye
Leave a Reply