Mahmood Shaam
kis ko hoga tire aane ka pata mere ba.ad
kaun sun pa.ega lamhon ki sada mere ba.ad
jis se yadon ke shabistan mahak uThte the
isi ḳhushbu ko tarasti hai saba mere ba.ad
main to ik raqs tha kuchh rang-bhare zarron ka
raaz ye ahl-e-zamana pe khula mere ba.ad
bam-o-dar chiḳhte hain rengti tanha.i men
shahr men ḳhaak uḌati hai hava mere ba.ad
hal-e-dil kis se kahe kis se lipaT kar ro.e
shahr-dar-shahr bhaTakti hai ghaTa mere ba.ad
koi sunta nahin viran paḌe hain kamre
sar paTaḳhti hai kivaḌon se hava mere ba.ad
‘sham’ ke sang se hi chandni shab phuTegi
dar-ba-dar phailti ja.egi ziya mere ba.ad
Leave a Reply