Poet
sham.a ki lau se khelte dekhe hain main ne parvane do
ik to maut se khel raha hai ik kahta hai jaane do
mere badan par tum barsao pyaar ki shabnam husn ki aag
yuun ghul-mil kar ek nazar se ham paḌh len afsane do
jin par jaan luTa di main ne vo hi mujh se barham hain
rone par pabandi hai to qahqaha ek lagane do
tum ne pila.i jitni pila.i dekho hain pyase rind abhi
saqi-gari se haath na khincho sab ki dua lo aane do
mai se main tauba kar lunga ye lo meri tauba hai
pahle mere hathon men apni ankhon ke mai-ḳhane do
us ka kaam hai kahta rahna apna kaam hai sun lena
vaa.iz bhi apna hai ‘kanval’ tum va.az use farmane do
Leave a Reply