dastan-e-fitrat hai zarf ki kahani hai
jitna uthla dariya hai utna tez paani hai
jin labon ne sincha hai tishnagi ke ḳharon ko
ab unhin ke hisse men jam-e-kamrani hai
phir se khulne vaala hai koi taaza gul shayad
baghban ki phir ham par ḳhasi mehrbani hai
aql kab se bhaTke hai nafraton ki vaadi men
pyaar ki magar ab bhi dil pe hukmarani hai
zaḳhm khate rahte hain muskurate rahte hain
ham vafa-shanason ki ye ada purani hai
barf ban ga.e arman munjamid hue jazbe
ziist ke samundar men kitna sard paani hai
apne saa.e se ham ḳhud ai hayat Darte hain
maslahat ki duniya men kitni bad-gumani hai
Leave a Reply