Anand Narayan Mulla
farq jo kuchh hai vo mutrib men hai aur saaz men hai
varna naghma vahi har parda-e-avaz men hai
tarjuman-e-gham-e-dil kaun hai ashkon ke siva
ik yahi tar-e-shikasta to mire saaz men hai
murgh-e-azad asiron ko hiqarat se na dekh
in ki taqat bhi tire bazu-e-parvaz men hai
ek le de ke tamanna hai so vo bhi nakam
dil men kya hai jo tiri jalva-gah-e-naz men hai
dil ko divana samajh kar na bahut chheḌo tum
kahin kuchh kah na uThe ye haram-e-raz men hai
Leave a Reply