Tari Rahega Soch Pe Wahshat Ka Bhut Kya

taarī rahegā soch pe vahshat kā bhuut kyā

TūTegā kisī taur ye shab kā sukūt kyā

paḌtī nahīñ hai aañkh ke sāhil pe surḳh dhuup

kartā maiñ ārzūoñ ke lāshe hanūt kyā

tum ne kahā to zahar bhī piinā paḌā mujhe

ab is se baḌh ke duuñ tumheñ sach kā subūt kyā

kaise kapās ke liye gandum ko chhoḌ duuñ

miTtī nahīñ hai bhuuk to kātūñ maiñ suut kyā

merī nazar bhī tālib-e-dīdār-e-hīr hai

malnā paḌegā jism pe mujh ko bhabūt kyā

‘arshad’ hamāre haath se phislegī ek din

pahle bachā sakā koī sāñsoñ kī huut kyā

Leave a Comment