Arshad Mahmood Arshad
taari rahega soch pe vahshat ka bhuut kya
TuTega kisi taur ye shab ka sukut kya
paḌti nahin hai aankh ke sahil pe surḳh dhuup
karta main arzuon ke lashe hanut kya
tum ne kaha to zahar bhi piina paḌa mujhe
ab is se baḌh ke duun tumhen sach ka subut kya
kaise kapas ke liye gandum ko chhoḌ duun
miTti nahin hai bhuuk to katun main suut kya
meri nazar bhi talib-e-didar-e-hir hai
malna paḌega jism pe mujh ko bhabut kya
‘arshad’ hamare haath se phislegi ek din
pahle bacha saka koi sanson ki huut kya
Leave a Reply