kahin pe qurb ki lazzat ka iqtibas nahin
tire ḳhayal ki ḳhushbu bhi as-pas nahin
hazar baar nigahon se chuum kar dekha
labon pe us ke vo pahli si ab miThas nahin
saja ke botalen Table pe muntazir hon magar
qarib o duur nigahon ke vo gilas nahin
samundaron ka ye namkin paani kaise piyun
piyasa huun magar itni ziyada pyaas nahin
ye aur baat ki mujh se bichhaḌ ke ḳhush hai magar
vo kaise kah de ki main in dinon udaas nahin
tumhare kapḌe kahin gard men na aT jaa.en
ye ḳhushk patton ka bistar hai sabz ghaas nahin
bujhi bujhi sahi ye dhuup kam nahin ‘aslam’
ab is ke ba.ad kisi raushni ki aas nahin
Leave a Reply