Azeem Kamil
hamare kaam ulTe paḌ ga.e hain
sabhi ke sard lahje paḌ ga.e hain
tumhari baat sunte hi achanak
mire sab rang phike paḌ ga.e hain
kisi tasvir par hai kaam jaari
ka.i ankhon pe halqe paḌ ga.e hain
tiri ankhon ka pichha karte karte
mire a.asab Dhile paḌ ga.e hain
tumhari kar rahen hain jab se ghibat
dar-o-divar niile paḌ ga.e hain
faqat vo muskura.e ja raha hai
tabhi to phuul saste paḌ ga.e hain
libason ki dalilen dene vaalo
yahan kirdar maile paḌ ga.e hain
Leave a Reply