Qateel Shifai
tere khaton ki khushbu
hathon men bas gai hai sanson men rach rahi hai
khvabon ki vusaton men ik dhuum mach rahi hai
jazbat ke gulistan mahka rahi hai har su
tere khaton ki khushbu
tere khaton ki mujh par kya kya inayaten hain
be-muddaa karam hai beja shikayaten hain
apne hi qahqahon par barsa rahi hai aansu
tere khaton ki khushbu
teri zaban ban kar aksar mujhe sunae
baten bani banai jumle rate-ratae
mujh par bhi kar chuki hai apni vafa ka jaadu
tere khaton ki khushbu
samjhe hain kuchh usi ne adab chahaton ke
sab ke liye vahi hain alqab chahaton ke
sab ke liye barabar phaila rahi hai baazu
tere khaton ki khushbu
apne siva kisi ko main janta nahin tha
sunta tha laakh baten aur manta nahin tha
ab khud nikal laai beganagi ke pahlu
tere khaton ki khushbu
kya jaane kis taraf ko chupke se mud chuki hai
gulshan ke par laga kar sahra ko ud chali hai
roka hazar main ne aai magar na qaabu
tere khaton ki khushbu
Leave a Reply