Saurabh Shekhar
viraniyon ke ḳhaar to phulon ki chhuvan bhi
is raah men aa.e hain bayaban bhi chaman bhi
khulna tha faqat ek daricha mire ghar ka
phir raushni bhi aa.ii, hui duur ghuTan bhi
bachche ne saja.i hai koi aur hi duniya
khincha hai jahan baagh vahin rakkha hai hiran bhi
yaad apne vatan ki mujhe aati nahin ab to
ab bhuul chuka hoga mujhe mera vatan bhi
hassas bana Daala mujhe had se ziyada
aur is pe mohabbat ne diya sher ka fan bhi
kis khoj men the shahr ke sab log na jaane
chehron pe udasi bhi hai ankhon men thakan bhi
asan nahin hai ye safar ruuh ka ‘saurabh’
haa.il hai tiri raah men ik dasht-e-badan bhi
Leave a Reply