chand bhi khoya khoya sa hai taare bhi ḳhvabida hain
aaj faza ke bojhal-pan se lahje bhi sanjida hain
jaane kin kin logon se is dard ke kya kya rishte the
hijr ki is abad sara men sab chehre nadida hain
itne barson ba.ad bhi donon kaise TuuT ke milte hain
tu hai kitna sada-dil aur ham kitne pechida hain
sun janan ham tark-e-ta.alluq aur kisi din kar lenge
aaj tujhe bhi ujlat si hai ham bhi kuchh ranjida hain
kanon men ik sargoshi hai be-ma.ani si sargoshi
ankhon men kuchh ḳhvab saje hain ḳhvab bhi umr-rasida hain
ghar ki vo maḳhdush imarat gir ke phir ta.amir hui
ab angan men peḌ hain jitne saare shaḳh burida hain
is basti men ek saḌak hai jis se ham ko nafrat hai
us ke niche pagDanDi hai jis ke ham girvida hain
Leave a Reply