Saif Zulfi
bechain huun ḳhunaba-fishani men ghira huun
bhige hue lafzon ke ma.ani men ghira huun
jo peḌ pakaḌta huun ukhaḌ jaata hai jaḌ se
sailab ke dhare ki ravani men ghira huun
mafhum ka sahil to nazar aata hai lekin
main der se gardab-e-ma.ani men ghira huun
ab log sunate hain mujhe mere hi qisse
main phail ke apni hi kahani men ghira huun
amboh-e-mah-o-sal ka kya baar uThega
Thahre hue lamhe ki girani men ghira huun
jis shaḳhs ko chaha hai usi shaḳhs ke karan
‘zulfi’ main kisi karb-e-bayani men ghira huun
Leave a Reply