Fauziya Rabab
milne ka bhi aḳhir koi imkan banate
mushkil thi agar koi to asan banate
rakhte kahin khiḌki kahin gul-dan banate
divar jahan hai vahan dalan banate
thoḌi hai bahut ek masafat ko ye duniya
kuchh aur safar ka sar-o-saman banate
karte kahin ehsas ke phulon ki numa.ish
ḳhvabon se nikalte koi vijdan banate
tasvir banate jo ham is shoḳh-ada ki
lazim tha ki muskan hi muskan banate
us jism ko kuchh aur sameTa hua rakhte
zulfon ko zara aur pareshan banate
kuchh din ke liye kaam se fursat hamen milti
kuchh din ke liye ḳhud ko bhi mehman banate
do jism kabhi ek badan ho nahin sakte
milti jo koi ruuh to yak jaan banate
Leave a Reply