Tumhaare KHwab Ki Tabir Ho Jaun Ijazat Hai

Sabeensaif

tumhare ḳhvab ki ta.abir ho ja.un ijazat hai

mohabbat ki main ik tasvir ho ja.un ijazat hai

kahin jaane na duun tum ko agar tum mere ho jaao

tumhare paanv ki zanjir ho ja.un ijazat hai

kisi ke ho ga.e ho tum mujhe shikva nahin koi

kisi ki main bhi ab jagir ho ja.un ijazat hai

vo ik taviz jo tum ne gale men Daal rakkha hai

main is taviz ki tahrir ho ja.un ijazat hai

zamane ke main har ik vaar se tujh ko bacha lungi

main tere haath men shamshir ho ja.un ijazat hai

tujhe ye mo.ajiza bhi main dikha sakti huun duniya men

jo tu chahe tiri taqdir ho ja.un ijazat hai

ḳhuda ne ye karishma chahaton ko saunp rakkha hai

main ik pal men tiri tauqir ho ja.un ijazat hai