Nasir Zaidi
ehsas ke sharar ko hua dene a.unga
main shahr-e-jan ko raakh bana dene a.unga
likkhe the harf-e-shauq jo main ne tire liye
ab an.suon se un ko miTa dene a.unga
tu ne ata kiye hain mujhe kitne dard-o-gham
is lutf-e-ḳhas ka main sila dene a.unga
samjha diya hai tu ne mohabbat hai ik ḳhata
main is ḳhata ki ḳhud ko saza dene a.unga
aaya tiri gali men agar lauT kar kabhi
guzre hue dinon ko sada dene a.unga
paaya tha rah-e-shauq men jo karb-e-agahi
is karb-e-agahi ko sula dene a.unga
bahar nikal ke jism ke zindan se ek din
main tujh ko zindagi ki dua dene a.unga
main kushta-e-vafa sahi ‘nasir’ magar zarur
ik bevafa ko dad-e-vafa dene a.unga
Leave a Reply