jalva-e-husn se hai surat-e-auqat na.i
din naya sub.h na.i shaam na.i raat na.i
in badalte hue halat ka matam kaisa
har na.e daur men banti hain rivayat na.i
har mulaqat ka andaz naya hota hai
jo bhi hoti hai vo hoti hai mulaqat na.i
naya-pan husn ko virse men mila ho jaise
har ada us ki na.i vaz.a na.i baat na.i
chand-taron men naya nuur umaD aata hai
‘charḳh’ vo aate hain aati hai nazar raat na.i
Leave a Reply