Mushaf Iqbal Tausifi
ashkon se ba-rang-e-ab ham ne
dariya ko likha sarab ham ne
ham ḳhud se saval kar rahe the
lo DhunD liya javab ham ne
dekha nahin us ko kitne din se
ungli pe kiya hisab ham ne
ab apni nigah darmiyan hai
dekha tujhe be-naqab ham ne
kya kya na hamare ji men aa.i
kuchh tum ko diya javab ham ne
jugnu bhi na de sake na de vo
manga nahin aftab ham ne
ik gham hai use bhi bhuul jaa.en
pi rakkhi hai kya sharab ham ne
aise ki suno to hans paḌo tum
dekhe hain ajiib ḳhvab ham ne
Leave a Reply