dosto hal-e-dil-e-zar zara us se kaho
kam na ho is men zara balki siva us se kaho
baat gaḌ.h kar na koi bahr-e-ḳhuda us se kaho
jitna main munh se kahun mera kaha us se kaho
ye na kahiyega ki ham zaḳhmon pe chhiḌkenge namak
jis kisi ne ki na chakkha ho maza us se kaho
sham-e-andoh ki shayad ki sahar ho jaa.e
mira din raat ka ye shor-o-buka us se kaho
chashm-e-bimar ne bimar kiya hai mujh ko
lab-e-jan-baḳhsh kare meri dava us se kaho
haath uTha baiThe na vo qatl se mere yaaro
ḳhun-baha main ne ba-hal apna kiya us se kaho
ik hasin puchhta tha hal-e-vaqar-e-ḳhasta
go bura ho mira itna to bhala us se kaho
Leave a Reply