(undulus ke maidan-e-jang men)
ye ghazi ye tere pur-asrar bande
jinhen tu ne bakhsha hai zauq-e-khudai
do-nim un ki thokar se sahra o dariya
simat kar pahad un ki haibat se raai
do-alam se karti hai begana dil ko
ajab chiiz hai lazzat-e-ashnai
shahadat hai matlub-o-maqsud-e-momin
na mal-e-ghanimat na kishvar-kushai
khayaban men hai muntazir laala kab se
qaba chahiye us ko khun-e-arab se
kiya tu ne sahra-nashinon ko yakta
khabar men nazar men azan-e-sahar men
talab jis ki sadiyon se thi zindagi ko
vo soz us ne paaya unhin ke jigar men
kushad-e-dar-e-dil samajhte hain us ko
halakat nahin maut un ki nazar men
dil-e-mard-e-momin men phir zinda kar de
vo bijli ki thi nara-e-la-tazar men
azaem ko sinon men bedar kar de
nigah-e-musalman ko talvar kar de