dil ka sarmaya liye tu bhi koi bazar dekh
tere dushman ka chamak uTTha hai karobar dekh
jis pe chalne ka sila hai manzil-e-amn-o-sukun
khinch di hai vaqt ne us raah men divar dekh
ruh-e-taza kaun phunkega tan-e-be-ruh men
lashkar-e-darmandagan hai be-sipah-salar dekh
hijraton ke silsile baaqi hain duniya men abhi
lekin ab DhunDe se bhi milte nahin ansar dekh
jaan de kar jaan li tu ne bhala ye kya kiya
teri qurbani hui mere gale ka haar dekh
jis ki ḳhushbu se mo.attar hai masham-e-zindagi
be-vaqar-e-vazn phirta hai vo nafa-dar dekh
ai sarapa-sham.a bazm-e-mah-o-anjum se nikal
kin andheron ko hai teri raushni darkar dekh
daman-e-dil bhar ke le jaate hain arbab-e-nazar
be-nava darvesh ka darbar hai darbar dekh
kis ke roke se ruki hai gardish-e-lail-o-nahar
zulmat-e-shab ke pujari sub.h ke asar dekh
kab talak ga.ega ‘mahir’ azmat-e-mazi ke giit
asr-e-nau ki roz-afzun garmi-e-bazar dekh
Leave a Reply