Pritpal Singh Betab
phir lauT ke dharti pe bhi aane nahin deta
vo paanv ḳhala men bhi jamane nahin deta
manzur nahin lamhon ki pahchan bhi us ko
aur naam daraḳhton se miTane nahin deta
ḳhush rahta hai ujḌe hue logon se hamesha
basne nahin deta vo basane nahin deta
maujon ke mujhe raaz bhi samjhata nahin vo
sahil pe safina bhi lagane nahin deta
de deta hai har baar vahi naav purani
ḳhvabon ko samundar men bahane nahin deta
ta.amir na.i chahta hai dekhna har-su
aur naqsh-e-kuhan koi miTane nahin deta
masruf bura vaqt mujhe rakhta hai ‘betab’
yaad achchhe dinon ki kabhi aane nahin deta
Leave a Reply