kitne dardon men davaon ki si tasir bhi hai
tan ba-taqdir hi rah ja ki ye tadbir bhi hai
sun ke ik ḳhvab hasin mere muabbir ne kaha
ye tira ḳhvab tire ḳhvab ki ta.abir bhi hai
mustava apne liye kis ne kaha kaise chuna
isi duniya men himala bhi hai pamir bhi hai
vasl-e-mad.hosh-kunan se gham-e-hijran ḳhush-tar
ki tasavvur men hai tu bhi tiri tasvir bhi hai
shoḳhi-e-husn ne chhoḌi na koi rah-e-farar
ek hi saans men inzar bhi tabshir bhi hai
tum ḳhuda ko to nahin mante lekin sahab
laakh tadbir karo taak men taqdir bhi hai
dosh-e-sayyad ke tarkash se faza sahm ga.i
dekhta kaun ki tarkash men koi tiir bhi hai
ye girah naḳhun-e-tadbir se khulne ki nahin
phir bhi naumid na ho naḳhun-e-shamshir bhi hai
sulhullah nahin jang bhi fillah nahin
na.ara-bazan koi shabbar koi shabbir bhi hai
ab to bas guzri hui umr basar karta huun
meri tanha.i ḳhamoshi bhi hai taqrir bhi hai
ḳhud-kalami bhi na de saath agar munh se kahun
ek andoh jo gahra bhi hai gambhir bhi hai
imtihan hai ki saza aur saza hai jo ye umr
kitni taqsir hai ya sach koi taqsir bhi hai
isi bait-e-nabavi ke fuqara ham bhi hain
ḳhuld bhi jis ke liye aya-e-tat.hir bhi hai
ham ne bazar-e-jadidan men bahut din DhunDa
koi ‘ghalib’ bhi hai ‘iqbal’ bhi hai ‘mir’ bhi hai
Leave a Reply