gham na do itna ki meri jaan nikal jaa.e kahin
ansuon se jism ki miTTi na gal jaa.e kahin
pak raha ho jaise laava jism ki chaTTan men
tera daman meri aahon se na jal jaa.e kahin
dil men us ki parvarish karna agar be-sud hai
ashk ban kar ḳhvab ankhon se nikal jaa.e kahin
raat ke asar hain phir ik zara vaqfe ke ba.ad
mera suraj bhi numu pa kar na Dhal jaa.e kahin
teri ye sohbat hai aisi jis pe sadiyan vaar duun
chhoḌ kar mujh ko na ye ma.asum pal jaa.e kahin
vo mire ehsas men lipTa hai mausam ki tarah
ab miri shaḳh-e-dil-o-jan men na phal jaa.e kahin
kah diya ‘maqsud’ ko apni faqiri hai aziiz
ho nahin sakta ye banda sar ke bal jaa.e kahin
Leave a Reply