Poet
qurban ho rahi hai miri jaan idhar-udhar
vaan rah pe hai jo zulf-e-pareshan idhar-udhar
jaate hain jab vo su-e-chaman sair ke liye
hote hain saath ashiq-e-nalan idhar-udhar
hain lakht-e-dil kahin to kahin para-e-jigar
rahte hain pesh-e-chashm-e-gulistan idhar-udhar
hangama-e-junun se jo donon hue hain chaak
daman idhar-udhar hai gareban idhar-udhar
zulfen chhuti hui hain jo chehre pe do taraf
lahra rahe hain afi-e-pechan idhar-udhar
dekha unhon ne murda mujhe main ne ashk-bar
aae nazar hain khvab-e-pareshan idhar-udhar
ya dushmanon se qata ho ya mujh se tark-e-rabt
kyuun dil ko kar rahe ho miri jaan idhar-udhar
mutrib vahan hain jama nava-saz us taraf
hote hain kal se aish ke saman idhar-udhar
kyuun kar karun main baat chap-o-rast-e-yar ki
rahte hain saath saath nigahban idhar-udhar
vo apni hat pe hain mujhe apne kahe ki zid
samjha rahe hain donon ko insan idhar-udhar
ankhon pe saeban hain maze diid ke hon kya
phaile hue hain daman-e-mizhgan idhar-udhar
vo but hai main huun sahib-e-din bahr-e-faisla
hote hain jama gabr-o-musalman idhar-udhar
vo chahte hain aaen main kahta huun aap jaun
kis lutf par hai raghbat-e-ehsan idhar-udhar
nalan vo aqraba se main huun mukhbiron se tang
kis kis tarah ke dil men hain arman idhar-udhar
harjai un ko kahte hain be-sharm mujh ko log
uthte hain rat-din yahi tufan idhar-udhar
manzur hai jo ranjish-e-sabiq ka faisla
har rose jama hote hain mehman idhar-udhar
hain pahluon men daagh jo donon taraf ‘nasim’
jalva dikha rahe hain gulistan idhar-udhar
Leave a Reply