Naqsh-e-Yaqin Tera Wajud-e-Wahm Bujha Guman Bujha

Abul Hasanat Haqqi

naqsh-e-yaqin tira vajud-e-vahm bujha guman bujha

kar-e-habib ke tufail rauzan-e-raegan bujha

fard-e-siyah ko miri nok-e-sinan pe laae the

un ki nigah pad gai arsa-e-imtihan bujha

mast-ravi ke darmiyan kaun qadam qadam gine

mishal-e-dil kahan jali shoala-e-jan kahan bujha

mere junun ka silsila marhala-var ho gaya

pahle zamin bujh gai baad men asman bujha

razm-e-gah-e-hayat men main na utar saka kabhi

ishq-e-zamana-khez men saara yahan vahan bujha

shauq ke dasht kho gae shahr sarab ho gae

barish-e-zar hui bahut halqa-e-tishnagan bujha

‘haqqi’-e-dil-girafta ke bas men na jaane kab nahin

hijr men shad-kam tha vasl ke darmiyan bujha