Jaun Eliya
baat koi umiid ki mujh se nahin kahi gai
so mire khvab bhi gae so meri niind bhi gai
dil ka tha ek muddaa jis ne tabah kar diya
dil men thi ek hi to baat vo jo faqat sahi gai
janiye kya talash thi ‘jaun’ mire vajud men
jis ko main dhundhta gaya jo mujhe dhundhti gai
ek khushi ka haal hai khush-sukhanan ke darmiyan
izzat-e-shaeqin-e-gham thi jo rahi-sahi gai
bud-o-nabud ki tamiz ek azaab thi ki thi
yaani tamam zindagi dhund men dubti gai
us ke jamal ka tha din mera vajud aur phir
subh se dhuup bhi gai raat se chandni gai
jab main tha shahr zaat ka tha mira har-nafas azaab
phir main vahan ka tha jahan halat-e-zat bhi gai
gard-fashan huun dasht men sina-zanan huun shahr men
thi jo saba-e-samt-e-dil jaane kahan chali gai
tum ne bahut sharab pi us ka sabhi ko dukh hai ‘jaun’
aur jo dukh hai vo ye hai tum ko sharab pi gai
Leave a Reply