Shagufta Shafiq
dil ne jab se ye choT khaa.i hai
zindagi ḳhaak men naha.i hai
jab bhi apni use suna.i hai
us ne to bas hansi uḌaa.i hai
ḳhushiyon ke phuul khil uThe man men
rut milan ki bahar laa.i hai
main jise chaah ke miTa na sakun
dil men ḳhvahish ajab sama.i hai
bhigi rahti hain ab miri ankhen
dard ki in dinon rasa.i hai
aise milna bhi koi milna hai
jis ka anjam hi juda.i hai
jo ke milti hai muskura ke bahut
sab se karti vahi bura.i hai
jaan de kar bhi kuchh nahin hasil
us ne karni hi bevafa.i hai
nahin sathi koi ‘shagufta’ ka
ik faqat tujh se ashna.i hai
Leave a Reply