jagte din ki gali men raat ankhen mal rahi hai
vaqt guzra ja raha hai dhuup chhat se tal rahi hai
ik libas-e-fakhira hai surkh gharqabi mahal hai
kuchh purani ho gai hai par kahani chal rahi hai
ik sitara saaz ankhon ke kinare bas raha hai
ik mohabbat naam ki ladki badan men pal rahi hai
paas tha khoya nahin hai jo na tha ab bhi nahin hai
umr bhar phir kyuun tabiat muztarib be-kal rahi hai
aana jaana saans ka kya vasl se mashrut hai
tu chale to tham rahi hai tu ruke to chal rahi hai
zard-ru vahshat-zada bhatki hui viran si
zindagi ik shaam hai aur shaam ban men dhal rahi hai