Poet
darpesh ajal hai ganj-e-shahidan kharidiye
turbat ke vaste chamanistan kharidiye
sauda pukarta hai ye fasl-e-bahar men
gulshan na mol lijiye zindan kharidiye
bazar men ye karti hain ghul meri bediyan
sohan hamare katne ko yaan kharidiye
raft-o-guzasht bhi hua vahshat ka valvala
sozan barae-chak-e-gareban kharidiye
le lijiye mira dil-e-sad-chak muft hai
shana barae-zulf-e-pareshan kharidiye
bazar-e-mustafa hai kharidar hai khuda
khud bikye yaan na kuchh kisi unvan kharidiye
jis vaqt ja nikalte hain bazar-e-husn men
himmat ye kahti hai ki paristan kharidiye
hulla koi mangaiye jaan di hai aap par
khilat hamare vaste ai jaan kharidiye
turbat pe meri hogi takalluf ki raushni
kafur bahr-e-sham-e-shabistan kharidiye
karte hain shor ganj-e-shahidan men gul-farosh
chadar barae-gor-e-ghariban kharidiye
vahshat men mushk ki na rasad muft lijiye
sauda hai bu-e-kakul-e-pechan kharidiye
hota hai shauq-e-ishq men rah rah ke valvala
majnun se dagh-e-dil sar-e-maidan kharidiye
har-su amal junun ke qalam-rau men chahiye
dhundva ke ek ek bayaban kharidiye
hote hain jazb-e-ishq se pariyon ke jamghate
ik mulk misl-e-mulk-e-sulaiman kharidiye
chaurang khelne men harifon ke ai ‘sharaf’
bachiye to tegh-e-rustam-e-dastan kharidiye
Leave a Reply