Ek Naghma Karbala-E-Beirut Ke Liye

beirut nigar-e-bazm-e-jahan

beirut badil-e-bagh-e-jinan

bachchon ki hansti ankhon ke

jo aaine chakna-chur hue

ab un ke sitaron ki lau se

is shahr ki raten raushan hain

aur rakhshan hai arz-e-labnan

beirut nigar-e-bazm-e-jahan

jo chehre lahu ke ghaze ki

zinat se siva pur-nur hue

ab un ke rangin partav se

is shahr ki galiyan raushan hain

aur taban hai arz-e-labnan

beirut nigar-e-bazm-e-jahan

har viran ghar, har ek khanDar

ham pa-e-qasr-e-dara hai

har ghazi rashk-e-askandar

har dukhtar ham-sar-e-laila hai

ye shahr azal se qaaem hai

ye shahr abad tak daaim hai

beirut nigar-e-bazm-e-jahan

beirut badil-e-bagh-e-jinan

Leave a Comment