Muhib Aarfi
dilbari us ruḳh-e-dil-ruba ki ḳhal-o-ḳhad se ibarat nahin hai
mahv-e-nazzara-e-ḳhal-o-ḳhad ko ye samajhne ki mohlat nahin hai
dil se hoti to hai raah dil ko fasla hai magar raah ḳhud bhi
ek ho jaa.en ham aap mil kar ishq ki aisi qismat nahin hai
jis ko apni nazar janta huun us ke jalvon ka hai ik karishma
vo nazar hi nahin jis ki hasti us ki marhun-e-minnat nahin hai
ye bala.en jo pesh-e-nazar hain ye to be-shak fareb-e-nazar hain
lekin un se jo taari hai dil par kya ye Dar bhi haqiqat nahin hai
gham hai jis ahd-e-mazi ka sab ko uTh ke aa jaa.en Dhanche jo us ke
baḌh ke un ko gale se laga le ye kisi men bhi himmat nahin hai
sham.a par jaan dena patango tum ne sikha hai kis madrase men
sham.a par jaan dena patango zindagi ki zarurat nahin hai
main ‘muhib’ ek sho.ala tha ya.ani hote rahne ka ik mashghala tha
hote hote vo shai ho gaya huun jis men hone ki taqat nahin hai
Leave a Reply