khud main dhuni ramae baithi huun
aaj khud ko bhulae baithi huun
jaane valon ka intizar nahin
apne raste men aae baithi huun
us ki ankhon men hai tilism koi
apna chehra lutae baithi huun
chand ko taish aa raha hai ki main
kyuun nazar ko milae baithi huun
phuul khilte hain mujh men sheron ke
ek misra samae baithi huun
rahguzar ehtiram kar mera
main kisi ke bulae baithi huun
har khushi zard ho gai jaise
ik aziyyat bhulae baithi huun
aaine par to hai bharosa mujhe
us se kyuun munh chhupae baithi huun
chubh rahi hai andheri raat mujhe
har sitara bujhae baithi huun
Leave a Reply