Do Din Ki Hansi Do Din Ki KHushi Anjam-E-Amal Rona Hi paDa

Ijtiba Rizvi

do din ki hansi do din ki ḳhushi anjam-e-amal rona hi paḌa

ik umr ganva.i jis ke liye ik roz use khona hi paḌa

ham aur ala.eq se chhuTen mumkin nahin jab tak ham ham hain

dariya ko ba-in azad-ravi zanjir-ba-pa hona hi paḌa

bazar men aa kar nadan dil manzar ke khilaunon par machla

aur pir-e-ḳhird ko kandhe par ambar-e-nazar Dhona hi paḌa

kya janiye aḳhir kyon itni azurda rahi honTon se hansi

qismat pe bhi hansna jab chaha aa.i na hansi rona hi paḌa

ham tuḳhm-e-mohabbat jannat se siine men chura kar le aa.e

is ret men kya ugta vo bhala haan laa.e the bona hi paḌa

bedar-dili ke mansube ham kya kya bandh ke aa.e the

duniya ne thapak kar lori di niind aa hi ga.i sona hi paḌa