Ai Khuda Ajab Hai Tera Jahan Mera dil Yahan Pe Laga Nahin

Ambareen Haseeb Ambar

ai khuda ajab hai tira jahan mira dil yahan pe laga nahin

jahan koi ahl-e-vafa nahin kisi lab pe harf-e-dua nahin

bada shor tha tire shahr ka so guzar aae hain din vahan

vo sakun ki jis ki talash hai tire shahr men bhi mila nahin

ye jo hashr barpa hai har taraf to bas is ka hai yahi ik sabab

hai labon pe nam-e-khuda magar kisi dil men khauf-e-khuda nahin

jo hansi hai lab pe saji hui to ye sirf zabt ka farq hai

mire dil men bhi vahi zakhm hain mira haal tujh se juda nahin

ye jo dasht-e-dil men hain raunaqen ye tiri ata ke tufail hain

diya zakhm jo vo hara raha jo diya jala vo bujha nahin

ai khuda ajab hai tiri raza koi bhed is ka na pa saka

ki mila to mil gaya be-talab jise mangte the mila nahin

vo jo harf-e-haq tha likha gaya kisi shaam khuun se ret par

hai gavah mauja-e-vaqt bhi ki vo harf us se mita nahin