basti men hai vo sannaTa jangal maat lage
shaam Dhale bhi ghar pahunchun to aadhi raat lage
muTThi band kiye baiTha huun koi dekh na le
chand pakaḌne ghar se nikla jugnu haat lage
tum se bichhḌe dil ko ujḌe barson biit ga.e
ankhon ka ye haal hai ab tak kal ki baat lage
tum ne itne tiir chala.e sab ḳhamosh rahe
ham taḌpe to duniya bhar ke ilzamat lage
ḳhat men dil ki baten likhna achchhi baat nahin
ghar men itne log hain jaane kis ke haat lage
savan ek mahine ‘qaisar’ aansu jivan bhar
in ankhon ke aage badal be-auqat lage
Leave a Reply