raushni dil men nazar aa.i hai
phir koi choT ubhar aa.i hai
ban ke tahrir-e-saba dars-e-junun
varaq-e-gul pe utar aa.i hai
aa.ina dekhne vaale tujh ko
kis ki tasvir nazar aa.i hai
dil ke zaḳhmon ka ye aalam jaise
kahkashan dil men utar aa.i hai
shukriya dasht ki virani ka
mujh se milne mire ghar aa.i hai
aaj ḳhush yuun bhi huun ‘nashtar’ ki saba
ek muddat men idhar aa.i hai
Leave a Reply