Anguthi

Akhtar Shirani

chhupaun kyuun na dil men khatim-e-gauhar-nigar us ki

yahi le de ke mere paas hai ik yadgar us ki

ye tanhai men mere lab tak aa kar muskurati hai

aur apni malika ki tarah dil ko gudgudati hai

qalam ke saath mere haath men har vaqt rahti hai

aur us ke dast-e-rangin ke fasane mujh se kahti hai

talai ungliyon ka jab mujhe qissa sunati hai

tasavvur men sitaron ke se paikar khinch laati hai

miri ‘salma’ ko is ne shaad aur nashad dekha hai

gahe masrur gaahe mail-e-fariyad dekha hai

ise maalum hain achchhi tarah betabiyan us ki

nahin poshida is ki aankh se be-khvabiyan us ki

shab-e-tanhai men is ne use bedar paaya hai

aur akasr dida-e-sarshar ko khun-bar paaya hai

ise maalum hai vo kis tarah maghmum rahti thi

kisi ke gham men lutf-e-zist se mahrum rahti thi

mira khat padh ke vo kis kis naaz se masrur hoti thi

phir apni bebasi par kis tarah ranjur hoti thi

ye shahid hai ki us ki sham-e-gham kyunkar guzarti thi

ye shahid hai ki vo ro ro ke kyunkar subh karti thi

vo jab dil thaam leti thi hujum-e-gham se ghabra kar

to ye karti thi us ki gham-gusari dil ke paas aa kar

ise maalum hai jo dard tha us paak siine men

basi hain us ke dil ki dhadkanen is ke nagine men

pahunchti hain shuaen is ki jis dam chashm-e-hairan tak

tasavvur mujh ko le udta hai ‘salma’ ke shabistan tak

jahan ‘salma’ ke aur mere siva hota nahin koi

anguthi khoi jaati hai magar khota nahin koi