mai ho abr o hava nahin to na ho
dard ho gar dava nahin to na ho
ham to hain ashna tire zalim
tu agar ashna nahin to na ho
dil hai vabasta tere daman se
dast mera rasa nahin to na ho
ham to teri jafa ke bande hain
tujh men rasm-e-vafa nahin to na ho
astan par to gir rahe hain agar
teri majlis men ja nahin to na ho
ham to hain saaf, bad-guman mere
tere dil men safa nahin to na ho
dil ko iksir haigi teri nigah
havas-e-kimiya nahin to na ho
ham to hasha nahin kisi se bure
koi ham se bhala nahin to na ho
talib-e-vasl kab talak rahiye
ho to ho jaa.e ya nahin to na ho
‘hatim’ ab kis ki mujh ko parva hai
koi mira juz ḳhuda nahin to na ho
Leave a Reply