Iqbal Kausar
ik lau thi mire ḳhuun men tahlil to ye thi
ik barq si rau thi miri qindil to ye thi
tere ruḳh-e-ḳhamosh se meri rag-e-jan tak
jo kaam kiya aankh ne tarsil to ye thi
banna tha to banta na farishta na ḳhuda main
insan hi banta miri takmil to ye thi
sanpon ke tasallut men the chiḌiyon ke basere
maftuh gharane! tiri tamsil to ye thi
Tiile ka khanDar sadiyon ki tariḳh liye tha
ijmal batata tha ki tafsil to ye thi
vo janta tha sajda faqat tujh ko rava hai
palTa na phir is hukm se ta.amil to ye thi
ik ḳhvab dhundlakon men bikharta hua ‘kausar’
aḳhir ruḳh-e-ta.abir ki tashkil to ye thi
Leave a Reply