Subh-E-Tarab Meri Aankhon Mein KHwab Kai Lahrae The

Poet

sub.h-e-tarab meri ankhon men ḳhvab ka.i lahra.e the

sham-e-alam ke sathi lekin baḌhte phailte saa.e the

ek tumhare pyaar ki ḳhatir jag ke dukh apna.e the

ham ne apne ek diip se kitne diip jala.e the

sirf javani ke kuchh din hi umr ka hasil hote hain

aur javani ke ye din bhi ham ko raas na aa.e the

husn ko ham ne amar kaha tha pyaar ko sachcha jaana tha

ek javani ke kas bal par saare sach jhuTla.e the

us ke bina jo umr guzari be-masraf si lagti thi

us be-mehr se dil ko laga kar bhi ham hi pachhta.e the

be-mehri ki tohmat bhi hai mehr-o-muravvat valon par

usi hava ne murjha.e hain jis ne phuul khila.e the

gharq-e-bada-e-nab hue vo chand se chehre phuul se jism

tum ne jin ki yaad men ‘ishqi’ jaam kabhi Takra.e the