kaun bata.e kaun sujha.e kaun se des sidhar ga.e
un ka rasta takte takte nain hamare haar ga.e
kanTon ke dukh sahne men taskin bhi thi aram bhi tha
hansne vaale bhole-bhale phuul chaman ke maar ga.e
ek lagan ki baat hai jivan ek lagan hi jivan hai
puchh na kya khoya kya paaya kya jiite kya haar ga.e
aane vaali barkha dekhen kya dikhla.e ankhon ko
ye barkha barsate din to bin piritam be-kar ga.e
jab bhi lauTe pyaar se lauTe phuul na pa kar gulshan men
bhanvre amrit ras ki dhun men pal pal sau sau baar ga.e
ham se puchho sahil vaalo kya biiti dukhiyaron par
khevan-hare biich bhanvar men chhoḌ ke jab us paar ga.e
Leave a Reply