Mohsin Naqvi
bichhaḌ ke mujh se ye mashghala iḳhtiyar karna
hava se Darna bujhe charaghon se pyaar karna
khuli zaminon men jab bhi sarson ke phuul mahken
tum aisi rut men sada mira intizar karna
jo log chahen to phir tumhen yaad bhi na aa.en
kabhi kabhi tum mujhe bhi un men shumar karna
kisi ko ilzam-e-bevafa.i kabhi na dena
miri tarah apne aap ko sogvar karna
tamam va.ade kahan talak yaad rakh sakoge
jo bhuul jaa.en vo ahd bhi ustuvar karna
ye kis ki ankhon ne badalon ko sikha diya hai
ki sina-e-sang se ravan abshar karna
main zindagi se na khul saka is liye bhi ‘mohsin’
ki bahte paani pe kab talak e’tibar karna
Leave a Reply