ik jafa-ju se mohabbat ho ga.i
haa.e ye kaisi himaqat ho ga.i
ho gaya jis par masiha mehrban
band us ke dil ki harkat ho ga.i
aa ga.i un ki javani aa ga.i
ho ga.i barpa qayamat ho ga.i
ye tasavvur ki karishma-saziyan
dekha jis shai ko vo aurat ho ga.i
liije vo uTThi nigah-e-iltifat
liije takmil-e-himaqat ho ga.i
jab nigah-e-naz kamsin ki uThi
nannhi-munni ik qayamat ho ga.i
jab hue vo ma.il-e-ahd-e-vafa
baḌh ke maan.e un ki luknat ho ga.i
kya kare bechari duzdida nigah
chori karna us ki fitrat ho ga.i
ye inayat-e-musalsal al-aman
duguni aur tiguni musibat ho ga.i
munh lagi ummal-e-ahd-e-nau ke bhi
kisi qadar gustaḳh rishvat ho ga.i
main ne yuun dil ko banaya a.ina
a.ina-gar ko bhi hairat ho ga.i
laakh zalim ne chhupa.e apne aib
‘shauq’ us ki phir bhi shohrat ho ga.i
Leave a Reply