Poet
supurdagi ka valvala jamal men nahin mila
mujhe fusun-e-be-ḳhudi visal men nahin mila
jo aa.ine se kirchiyon ke darmiyan ka tha safar
shikast-e-zat ki kisi misal men nahin mila
alam-nasib shaam men hai mehr-e-jan bujha bujha
nashat-e-ranj bhi mujhe ma.aal men nahin mila
hazar yasmin mushk-bu huun tere qurb men
chaman ka aks tere ḳhadd-o-ḳhal men nahin mila
vo sar-burida chand bhi ghurub ho gaya magar
sitara-e-sahar shab-e-zaval men nahin mila
‘nadim’ har qadam pe dard-e-be-aman ka dar khula
sukun is jahan-e-be-misal men nahin mila
Leave a Reply