Ibrahim Ashk
mujhe na dekho mire jism ka dhuan dekho
jala hai kaise ye abad sa makan dekho
na chaaT jaa.e kaḌi dhuup surḳhiyan lab ki
shajar ki chhanv kisi ghar ka sa.eban dekho
mohabbaton ki tasalli bahut zaruri hai
sitam ke shahr men ik yar-e-mehrban dekho
koi bharosa nahin abr ke barasne ka
baḌhegi pyaas ki shiddat na asman dekho
tumhara vaqt nahin sach ke bolne vaalo
na chup rahoge to kaT ja.egi zaban dekho
koi hasin abhi raste se guzra hai
lagao aankh se qadmon ke jo nishan dekho
hunar to roz hi bikta hai chand sikkon men
ḳharid le na zamana tumhen amaan dekho
nahin hai tum men saliqa jo ghar banane ka
to ‘ashk’ jaao parindon ke ashiyan dekho
Leave a Reply